الازهر

دليل و لي الأمر للتقدم في المعاهد الأزهرية لمرحله رياض الاطفال والاول الابتدائى(التقديم الورقي) او الكترونيا مع المستندات المطلوبه

دليل و لي الأمر للتقدم في المعاهد الأزهرية لمرحله رياض الاطفال والاول الابتدائى(التقديم الورقي) او الكترونيا مع المستندات المطلوبه

 

أعلنُ الأزهرُ الشريفُ عن فتحِ باب القبول إلكترونيًا لكل من مرحلة رياض_الأطفال والصف الأول الابتدائي بالمعاهد الابتدائية الأزهرية بأنواعها (العادية – النموذجية – الخاصة) بداية من اليوم الثلاثاء الموافق ١/ ٦/ ٢٠٢١ ولمدة شهر، وذلك عبر بوابة الأزهر الإلكترونية من خلال الرابط 👇

https://azhar.gov.eg/tnsek

وتقرر أن يكون الحد الأدنى لقبول مرحلة رياض الأطفال من سن ٤ سنوات حتى سن ٥ سنوات ١١ شهرًا و٢٩يومًا، وبالنسبة للصف الأول الابتدائي تقرر أن يكون الحد الأدنى ٦ سنوات حتى سن ٩ سنوات، وفي حال وجود أماكن شاغرة بمرحلة رياض الأطفال، والصف الأول الابتدائي يجوزُ النزولُ بالسن {٦ أشهر} كحد أدنى لسن القبول.

 

في المنشور السابق اتكلمنا عن مميزات المعاهد الأزهرية و أنواعها و كيفية التقديم الإلكتروني و التحويل من العام للأزهر و العكس و للناس اللي ما شافت المنشور ممكن تشوفوه من هنا و يا ريت تاخدوا جوله في التعليقات هتلاقوا كتير جدا من الأجوبة على الأسئلة اللي ممكن تدور في أذهانكم

https://www.facebook.com/groups/132741060757187/permalink/565342824163673/

النهاردة هنتكلم عن تقديم الملف الورقي و مكوناته

١- في خلال 15 يوم من ظهور نتيجة التنسيق مطلوب من حضرتك تروح المعهد اللي اختارته لطفلك و تشوف ابنك هيدخل المعهد ده و لا هيتم تحويله لمعهد تاني لأن مفيش مكان له هنا و ده وارد .

٢- هتجهز الملف الورقي و تقدمه و ممكن تجهزه من دلوقتي و تخليه عندك لليوم ده .

٣- المطلوب في الملف صورة بطاقة ولي الأمر سواء الأب أو في حالة غيابه تبقى الأم أو الحاضن للطفل .

٣- لو لا قدر الله الأب متوفي هنجيب صورة من شهادة وفاة الأب .

٤- لو لا قدر الله الوالدين منفصلين يبقى هنجيب صورة من شهادة الولاية التعليمية على الطفل و دي بنجيبها من المحكمة و بتطلع بسهولة .

٥- مطلوب أصل شهادة ميلاد كمبيوتر للطفل اللي هي الرقم القومي – مش الورقية اللي مكتوب على ضهرها التطعيمات – و ممكن المعهد يطلبها حديثة يعني المائية و دي بنجيبها من السجل المدني .

٦- مطلوب ٤ صور فوتوغرافية للطفل مقاس ٤ × ٦ و في معاهد بتطلب أكتر من ٤ صور عشان كارنيه التأمين الصحي و كارنيه المدرسة … فنجهز صور بزيادة.

٧- مطلوب أصل البطاقة الصحية للطفل و دي البطاقة اللي لونها لبني للصبيان و بمبي للبنات و لو ضائعة بنطلع بدالها من التأمين الصحي بعشرة جنيه ، و نحط عليها طوابع تأمينية بنجيبها من التأمين الصحي و سعرها عن كل سنة قبل 2016 بمبلغ ٨ جنيه و عن كل سنة من بعدها و جاي بمبلغ ١٢ جنيه .

يعني لو فرضنا مثلا طفل مولود في ٢٠١٥ يبقى سنة × ٨ جنيه و خمس سنوات × ١٢ جنيه المجموع ٦٨ جنيه و هكذا ..

المعهد هيشوفها و يرجعها لك تاني ( شكل البطاقة موجود تحت )

٨- مطلوب نصور البطاقة دي ، بتصور الغلاف من الداخل مع الصفحة الأولى الموجود فيها بيانات الطفل مش بتصور البطاقة كلها و لا الغلاف من الخارج .

٩- مطلوب استمارة كشف طبي اسمها استمارة بطاقة صحية للطفل و دي بنجيبها من أي مكتبة بتجهيز ملفات التقديم و نحط عليها صورة للطفل و نختمها من أي مستشفى حكومي أو مركز طبي أو وحدة صحية و ناخد الطفل معانا و احنا رايحين عشان احتمال يكشفوا عليه بجد .( صورة الاستمارة موجودة تحت )

١٠- مطلوب نموذج طلب التحاق بالأزهر بنجيبه من أي مكتبة بتجهز ملفات التقديم ( و ممكن نطبع الموجود تحت ) .

١١- مطلوب خمس أظرف جوابات بنجيبهم من أي مكتبة و نكتب عليهم بيانات المراسلة مع ولي الأمر .

١٢- مطلوب طوابع بريدية للجوابات دي و بنجيبهم من أي مكتب بريد بمبلغ ١١ جنيه لكل ظرف يبقى مجموعهم ٥٥ جنيه.

١٣- مطلوب طوابع تمغة بمبلغ ٢،٧٠ قرش و معاهم طوابع تنمية موارد بمبلغ ٣٠ قرش و بنجيبهم من أي مكتب بريد .

١٤- مطلوب طابع شهيد بمبلغ ٥ جنيه و بنجيبه من أي مكتب بريد .

١٥ – مطلوب نحط كل الورق ده في دوسيه كرتون .

١٦ – مطلوب نحط الدوسيه الكرتون في ظرف ورقي كبير .

١٧- مطلوب نحط الظرف الورقي الكبير في حافظة بلاستيك .

١٨- مش بنطبع استمارة التقديم على الموقع و لا بنطبع الصفحة اللي فيها إشعار نجاح التسجيل .

١٩- الحاجات المطلوبة دي ممكن تشوفها كتير بس هي سهلة و مش بتاخد وقت .

٢٠- حاول يكون معاك أكتر من صورة لكل الأوراق المطلوبة .

٢١- لو إنت مش فاضي ممكن تروح أي مكتبة بتجهز ملفات و تطلب ملف التقديم للأزهر و لازم تأكد على كلمة الأزهر .

٢٢- لو إنت ما تعرفش المكتبات القريبة منك و بتجهز الملفات ممكن تسأل في المعهد هيدلوك على أكتر من مكان و إنت اختار المكان اللي تجيب منه براحتك .

٢٣- ربنا يبارك في أولادنا و بناتنا و ينفع بهم .

و دي صور لبعض المستندات المطلوبة

 

دليل ولي الأمر للتقديم الإلكتروني للمعاهد الأزهرية

المنشور ده هنشرح فيه اغلب الأمور المتعلقة بالتقديم الإلكتروني للمعاهد الأزهرية عشان الحيرة اللي فيها كتير من أولياء الأمور

١- أنا مدرس في الأزهر وولي أمر في نفس الوقت

2- الأزهر أفضل من العام لأن الأزهر بيدرس نفس مناهج العام وزيادة عليها في الابتدائي قرءان وفي الإعدادي والثانوي بيدرس زيادة علوم شرعية واللغة العربية بتوسع يعني نحو وصرف وبلاغة وأدب ……

3- النموذجي أفضل من العادي لأن النموذجي بيدرس محتوى انجليزي زيادة كمستوى رفيع بجانب المنهج المقرر وده مش بيتحسب في المجموع بس بينمي اللغة عند الطفل.

4- المعاهد النموذجية بتدرس مادة حاسب آلي و دي مادة نجاح و سقوط لكن لا تضاف للمجموع الكلي .

5- سن القبول في الرياض للنموذجي اربع سنوات وللعادي ثلاث سنوات ونصف.

6- سن القبول للصف الأول النموذجي ست سنوات وللعادي خمس سنوات ونصف

7- التقديم النموذجي والعادي على موقع بوابة الأزهر

8- مش محتاجين طباعة تسجيل الرغبات لأن الأسماء بتوصل من التنسيق للمعاهد مش محتاجين نعمل زي التربية والتعليم .

9- لما نتيجة التنسيق تظهر بتروح المعهد وتقدم الملف ومكوناته في الصور

9- في فرق بين طباعة التسجيل وطباعة طلب الالتحاق الموجود في الصور

10- كل الأسماء اللي هتيجي في التنسيق هتتقبل و مهمة المعهد مع الإدارة و المنطقة يوفر لهم مكان و لو تعذر ده يبقى المعهد هياخد الحد الأقصى للكثافة و الإدارة تحول الباقي لأقرب معهد بعد استشارة و موافقة ولي الأمر .

11- توفير مكان للطفل مهمة المعهد والمنطقة مش مشكلة ولي الأمر يعني محدش يقولك تبرعات وكلام فاضي .

12- الملف سهل تجهزه بنفسك ولو مش فاضي روح هاته من أي مكتبة بتجهز الملفات .

13- المعاهد النموذجية بتعمل مقابلة للطفل مش امتحان يعني مفيش اقرا ولا اكتب ولا اي تعقيد .

14- ممكن تقدم للطفل أولي مباشر بدون ما يكون في الرياض بس القوة الأساسية للمعهد بتكون من الرياض وبرضه سياسة الأزهر قبول كل المتقدمين طالما مستوفين الشروط

15- لو الطفل في الرياض ورايح أولى مش محتاج تقدم له أولى لأن المعهد بينقله من غير ما انت تسجله .

16- مصاريف المعاهد العادية حوالى 60 جنيه في السنة والنموذجي 150 تقريبا ده في الرياض وبالنسبة لأولى بتزيد عشرة أو عشرين جنيه عن كدة و في بداية كل مرحلة تعليمية بتدفع 200 جنيه ، طبعا ده غير ثمن كتب المستوى الرفيع لو إنت عايز تاخدهم من المعهد و لو مش عايز براحتك

17- التبرعات ممنوعة انت عايز تساعد بحاجة انت حر وخد بيها إيصال سواء فلوس أو أدوات ولو حد ابتزك المنطقة موجودة وقطاع المعاهد مش بعيد والناس كلها محترمين

18- ينفع تحول من أي معهد أزهري لأي معهد أزهري أيا كان نوعه عادي ولا نموذجي في أي صف دراسي من تانية ابتدائي لتانية ثانوي في الفترة من أول أغسطس لمنتصف أكتوبر من كل عام .

19- التحويل من الأزهر للتربية والتعليم في خلال شهر أغسطس فقط بشرط موافقة الطرفين

20- التحويل من التربية والتعليم للأزهر في شهر أغسطس فقط بشرط موافقة الطرفين واجتياز الطفل اختبار قبول ليتأكد من حفظه منهج القرءان المقرر على زمايله

21- التحويل في أي سنة قبل الصف الثالث الاعدادي

بعد كدة مفيش تحويل للأزهر وكمان مفيش تحويل للتربية والتعليم بعد ثالثة إعدادي للثانوية العامة العادية بس ينفع ثانوية عامة منازل أو خدمات أو ثانوي فني أو مدارس المتفوقين في العلوم و الرياضيات أو التمريض العسكري أو مدارس الشركات زي غبور مثلا ( بعض المسارات دي شرط فيها المعادلة و بعضها له نسب محددة )

22- في الثانوي الأزهري إما أدبي وإما علمي مفيش علمي علوم وعلمي رياضة

23- و ده رابط التقديم الإلكتروني على موقع بوابة الأزهر 👇

https://azhar.gov.eg/tnsek/Default.aspx

مايحتوى علية ملف التقديم 

 

 

باقى اوراق الملف من البطاقه المدرسيه والاقرار بأن ابنك غير مقدم فى اى مدرسه او معهد اخر (٦) صورة بطاقة الرقم القومى لك ومكتوب عليها رقم التليفون بتاعك للتواصل واخيرا تأخذ ايصالا من المعهد بأنك قد قدمت الملف الخاص بابنك للمعهد حفظ الله أولادكم وثق تمام الثقه بأن أباك قد فعل مثلما تفعله انت مع أبنك وفقكم الله وسدد خطاكم لا تنسونا من صالح دعائكم بظهر الغيب رحم الله أبى

 

رابط التقديم لرياض الأطفال والصف الأول الإبتدائي 👇

http://www.azhar.eg/education/form

 

 
 

رابط التقديم على بوابه الازهر 

 
 

 

 

 

 

الوسوم
اظهر المزيد

بوابة الواقع

يحرص دائما على خدمة التعليم والمعلم والطالب الازهرى عمل محررا بمواقع وبوابات الكترونية عديدة لأنه فى قلب الحدث

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

1 × 2 =

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock